無論你係準備嚟澳洲移民、工作抑或係讀書，都一定有搵屋同埋唔知住邊區好嘅煩惱！🤔 普遍喺香港都會因為昂貴屋租同埋唔合比例嘅尺數而即時打斷咗搬出去自住嘅諗法，所以係租賃方面都唔太熟悉。如果你係準備嚟澳洲讀書嘅Roodies，好多時候agency都會推薦你先入住homestay試吓，畢竟人生路不熟，有locals照顧到你起居飲食，又教到你基本生活所需同埋當地文化好似都唔錯！但如果你唔想住homestay，其他選擇又有咩優缺點呢？🔍 值得注意嘅係喺澳洲，你見到嘅租金通常只係一星期嘅價錢，而通常都係每兩星期/一個月咁交租。今次呢篇文相信一定幫到各位Roodies，等小編用個人經驗同大家逐一拆解各類住宿嘅優缺點：🕵️♀️
Homestay
相信大部分嘅香港留學生同小編一樣都係經由agent申請嚟澳洲讀書，而且未試過隻身一人喺外國生活過！對於未知嘅生活加上屋企人嘅擔心，一般都會聽agent講，試吓住homestay先。點知中伏多過開心，對於小編嚟講，住homestay絕對係一個惡夢😵。雖則話homestay有相關機構做審核，但並唔係每個都合符標準，而且同住嘅更未必係locals。小編當年就俾人分配咗住係斯里蘭卡人嘅屋企，價錢包早晚餐，但係就經常俾隔夜飯我哋食，有時連食物過咗期發咗霉都唔理！另外，當地雨量低而且試過經歷缺水，所以澳洲水費偏貴。如果你習慣係沖一個鐘涼，咁住homestay就未必啱你喇。因為小編就試過俾屋主要求限時5-10分鐘沖好，最癲仲試過沖耐咗俾佢發現，之後就要set timer沖涼😓。不過當然亦都有聽過好似皇宮生活咁嘅homestay，所以都係睇你夠唔夠運氣！
價錢：250-400澳紙per week - 包食住及水電煤，上網費可能會另計，而且有限制上網流量🚫 (價錢視乎州份地區而有所調整)
Sharehouse
Sharehouse - 顧名思義即係你要同一班唔識嘅人合租一間屋，而你就係租住其中一間房嘅住戶。☝️ 而且住喺sharehouse你係冇得揀同住嘅人，亦即係你有機會同嚟自世界各地嘅人一齊同住。另外，你需要同大家share所有公共設施，例如廚房，飯廳同廁所等等。話晒大家住喺同一屋簷下，基本打招呼都需要有，而且生活習慣需要互相尊重同適應。
根據小編個人經驗，sharehouse嘅質素都可以好參差，有啲可能同時租俾好多人，甚至連客廳都係有人住。有啲可能唔做家務，搞到公共設施都污糟邋遢。但有啲可能係屋主包清潔，你只係需要清潔自己間房。小編以前住過一間sharehouse就係嚟自唔同國家嘅international students，有時會一齊煮飯食，又會搞吓party都幾開心！😆
價錢：100-500澳紙 per week (價錢視乎州份地區、房間大細、有冇個人廁所等等而定)
學生宿舍
如果喺香港讀u，住hall係享受u life最直接嘅方法，個個都覺得hall life生活多姿多彩😍！但其實係澳洲好多香港留學生都未必揀住hall，事關住hall分分鐘貴過自己係外面租屋住。雖則價錢係包水電煤、任開冷暖氣、有清潔姐姐清潔所有公共設施。但係根據個人經驗，佢哋清潔大部分都係hea做，分分鐘抹咗等於冇抹🥱。而且好多時候啲外國roommates覺得有清潔姐姐執屋，食完嘅碗碟直接放喺到唔洗，如果你有潔癖應該會頂唔順...🤦♀️ 當然有住hall嘅香港人會約埋一齊玩，同香港讀u住hall嘅生活無異！
除咗傳統嘅u hall，喺澳洲有好多私人發展商興建嘅學生宿舍，而房型一般有6-7人房，4人房，2人房同studio。通常全新嘅私人student hall價格都偏貴，但環境設計上都比較時尚，而且有好多公共設施，例如free gym、game room、室外BBQ場、自修室、公共廚房、各類免費活動，有啲更設有電影院！🎬
學校提供嘅學生宿舍價錢：150-400澳紙 per week - 包水電煤及清潔費 (價格視乎學校而有所調整)
私人學生宿舍價錢：330-504澳紙per week - 包水電煤 (清潔費另計，價格視乎發展商而有所調整，此價格為Atira Melbourne)
整租House/ Apartment
如果你有一班朋友一齊去澳洲讀書，喺外面take晒成間house/ apartment住其實比較經濟實惠。通常可以經兩個途徑租，第一係搵當地嘅地產公司，第二係上網搵業主直接放租。喺澳洲經地產租樓比較麻煩，需要準備好多證明文件去睇你經濟上係可以應付租樓開支，加上好多屋主都未必想租俾留學生。除咗經濟考量之外，最大原因係驚學生比較多機會開party，影響隔離左右而被人投訴，不過經地產租樓就相對比較有保障。而另一個方法就係搵業主放租，優點係比起經地產公司租，成功率會大啲同埋選擇多啲。而缺點就係多數肯租俾留學生嘅屋主都係中國人，但中國屋主有好有唔好，有啲淨係收租然後咩都唔理，要你自己俾錢維修。另外，無論經邊一方租屋住，都要預繳一至三個月不等嘅押金(Bond)，視乎地產經紀同屋主份約點訂。小編建議Roodies係inspection嘅時候一定要check清楚屋企所有環境狀況同設施，問清楚所有細項，因為當你搬走又或者喺住緊嘅期間有任何損壞，都可能按比例扣bond，唔問清楚分分鐘仲會成份扣晒！遲啲小編會出一篇澳洲租屋教學，記住留意返啦☝️😏。
價錢：400澳紙或以上 per week (成間屋) - 唔包水電煤上網 (視乎州份地區、新舊程度、房間數目及包含嘅設備而影響價格)
無論住喺邊都好，最緊要自己覺得舒服開心，做多啲research咁就萬無一失！😎 而且離鄉別井並唔係一件容易嘅事，反正都決定去澳洲讀書，就咩都試吓可以見識多啲，共勉之！🙌
記得Follow/Share我哋 Facebook 同 Instagram!!!
IG:@kongaroo_au
Comments