Kongaroo_Media
- 2022年1月31日
- 已讀 4 分鐘

🇦🇺澳洲留學生打工仔須知 - 工作時限臨時更新 + 最低工資+ TFN稅號申請

2022年1月19日，澳洲政府宣佈對簽證嘅幾項改動📃。為咗鼓勵學生同工作假期嘅簽證持有者盡快返澳洲🇦🇺，幫助解決當前澳洲嘅勞動力短缺問題⚒，符合條件嘅簽證持有人可以獲得簽證申請費嘅退款💰。仲有即日起取消對學生簽證持有人及工作假期簽證持有人嘅工作時限⏱。

去澳洲做留學生都會留意下有冇得打工💼、搵下生活費💵。究竟留學生喺澳洲打工要注意啲咩？基本人工應該要幾多先夠💰？！做Part-Time 又洗唔洗交稅呢？想知要點做就繼續睇落去啦！

根據最Update嘅新聞，假如你喺境外🛩，而又將會於 2022 年 1 月 19 日至 3 月 19 日期間入境澳洲嘅學生簽證持有人🛬，將有資格獲得申請簽證費用（Visa Application Charge）嘅退款（AUD$630）💰；假如你喺境外，而又將會於 2022 年 1 月 19 日至 4 月 19 日期間入境澳洲嘅工作假期簽證持有人🛬，都有資格獲得申請簽證費用嘅退款（AUD$495）💰。

仲有，一般嚟講，早前普通學生簽證每兩星期工作不得超過40小時🕰。但為咗解決勞動人口不足問題而有嘅新政策— 政府將暫時取消對所有行業嘅學生簽證持有人👩‍🎓及工作簽證持有人👨‍🔧嘅工作時間限制。同時適用於學生簽證嘅副申請人。

以上改動都係屬於臨時性，政府將喺4月份會再對呢項政策進行相關審查。

1⃣留學生喺澳洲打工要注意嘅事項：

正常情況下學生簽證有規定課程正式開始前唔可以工作🔆。學生簽證主申請人可以part time工作（每 2 星期工作唔超過 40 小時，假期就無工作時間限制）🕐；副申請人就需要根據具體嘅簽證條款而定。💼

如果違反簽證條款就有可能被取消簽證，遣返返香港。⚠⚠留意最近由於疫情勞動力短缺，澳洲政府暫時放寬咗呢個工時限制。⚠⚠

如果你參與嘅工作係學校課程規定嘅實習，就可以唔計算喺每 2 星期工作 40 小時以內。

💡注意：澳洲學校規定全職讀書嘅留學生出勤率需要達到 80%，否則可以開除學籍，並上報移民局取消簽證。所以即使打工時間放寬，都唔好怠慢學業‼‼

2⃣澳洲薪資參考：

MIN HOURLY RATE: AUD20.33💰

根據澳洲: Fair Work Commission，2021年最低法定時薪大約係稅前AUD20.33💰。如果係causal role，人工應該再高25%，即時薪約AUD25.41💰。

除了正常人工之外，仲有Superannuation，無論你係學生、TR PR、full time、part time定係casual，僱主都應該幫你交9.5%嘅養老金！呢個係法律規定嘅僱主義務！每年最少交四次，如果逾期唔交，仲要再加10%。💰

💫大家千祈唔好忽視呢個養老金，學生同工作簽證喺簽證到期，離開澳洲嘅時候都可以申請拎出嚟！

Reference: Fair Work Commission Website

3⃣TFN 澳洲稅號：

國際學生到澳洲求學並開始做嘢嗰陣，就會受澳洲稅法嘅影響🧾。國際學生必須向澳洲稅務局 (Australian Taxation Office ; ATO )申請繳稅號碼 (Tax File Number；TFN)💻。每人一生中只會有一組稅號，即使申請咗其他簽證都唔受影響📋。稅號要喺入境澳洲之後先可以申請，通常申請後，28日之內就可以收到ATO寄嚟嘅稅號信件📩📩。

當你開始工作之後，僱主會要求你喺28日內提供繳稅號碼。喺出糧時，僱主通常會直接將稅嘅部分扣除。僱員可以喺ATO嘅官網上面查到僱主幫自己繳交嘅稅。喺財政年度結束嗰陣，可以根據個人情況申請退稅。

TFN 申請網站：https://www.ato.gov.au/iar/#beforeStart

點樣申請澳洲稅號（TFN）？📝

澳洲稅號Tax File Number – TFN係一組特別號碼。申請後，稅號會以傳統嘅平郵方式寄出，所以申請最好有一個方便收信嘅澳洲地址。同埋要記得保存好呢個號碼，並喺更換住址或名字時，及時通知澳洲稅務局。之前小編就有試過唔見咗，後來想申請退稅就搞咗好耐。建議可以喺myGov上註冊一個賬號，連埋ATO個賬號，就萬無一失喇。😎

如果因為無固定位址而無法收到稅號，或者係之後唔見咗，你就可以帶自己嘅護照，到澳洲任何一間稅務局重新問返稅號。👍