相信有唔少Roodies同小編一樣，都好鍾意食日本嘢🍣。小編鍾意食🇯🇵日本嘢嘅程度簡直係誇張到一日三餐食魚生都無問題呀！香港好食嘅日本餐廳真係多到數都數唔晒，喺未有疫情之前，任性啲就算要✈️飛一轉日本都只係需要幾個鐘頭🕓。小編離鄉別井多年，喺Brisbane同Gold Coast兩大城市當中，當然發掘咗好多值得一試嘅日本餐廳🍴，包你食過之後返唔到轉頭啊！
布里斯班 - Sushi Edo
Photos: @sushi_edo
@mitoki.brisbane
Sushi Edo係一間連鎖迴轉壽司🍣餐廳，每碟只係需要AU$3.8🤑，可以稱得上為👨🎓學生恩物。🥺窮小編由啱啱嚟Brisbane讀書到𠵱家都仲食緊，除咗因為價錢吸引之外，嘢食嘅質素亦都唔錯㗎！就連😍海膽、三文魚腩同三文魚子都只係需要AU$3.8！呢個價錢喺澳洲食日本嘢真係算抵食！
布里斯班 - Mitoki
Photos: @mitoki.brisbane
位於🦘Kangaroo Point嘅Mitoki算係小編喺Brisbane最鍾意嘅餐廳🍴。餐廳用上🪑木質嘅枱同櫈，令到小編覺得自己去咗間隱世日本餐廳👹，唯一美中不足嘅係餐廳大部分座位都係露天嘅，☀️夏天去食真係有啲辛苦。小編就推薦大家去食Mitoki嘅lunch set🍴，因為比較扺食，而且份量都比較多。以下嘅都係小編推薦嘅set：雜錦刺身飯 - AU$25.80、壽司set - AU$24.80三文魚便當 - AU$27.80。食飽飯仲可以沿著Brisbane River🚶♂️散步𠻹。
布里斯班 - Genkotsu Ramen
Photo: @thaoheartgoodies
Photo: @selenetam
Genkotsu Ramen🍜 係一間位於Toowong嘅拉麵舖，喺Runcorn都有分店。呢間拉麵舖係小編讀書📚時期嘅至愛，由UQ坐巴士🚌去只係需要15分鐘。佢哋主打嘅有四款湯底：🧂鹽、味噌、醬油同🐟魚介，另外仲有啲特色拉麵，例如擔擔麵同🖤黑蒜油拉麵，而小編至愛嘅就係🐟魚介湯沾麵，湯頭真係好濃郁，🐷叉燒仲有陣陣嘅煙燻味。
黃金海岸 - Izakaya You
Photos: @youjapaneserestaurant
小編放假通常都會約埋一班🐷豬朋🐶狗友去到呢間🇯🇵Izakaya You度，🍻飲吓嘢🥟食吓嘢。呢間日式居酒屋🍺嘅氣氛好正！除咗好多日本人會嚟食之外，職員嘅態度亦好好，時不時都會同熟客仔🗣吹下水。小編覺得值得一試嘅有海膽刺身、炸櫻花蝦🦐、炸雞皮🐥、雞軟骨🦴同各式各樣嘅刺身等，全部嘢都好適合送酒🍺！如果大家鍾意搵個地方飲吓嘢、食吓嘢、吹吓水，咁就一定要去Gold Coast嘅Izakaya You啦！
黃金海岸 - Muso Ramen
Photos: @muso_ramen
等小編私人介紹多間🍜拉麵店畀咁多位Roodies啦！呢間Muso Ramen逢星期一、二都唔開🤨(好囂張），傳聞話佢哋會襯著呢兩日嚟熬製拉麵嘅🥣湯底，真係煲到起晒膠，超級濃郁！佢哋主打兩款湯底，分別係🐷🦴豬骨同🐥雞，每一款都係小編嘅至愛！另外必叫嘅係🧀芝士🐖豬肉餃子，每碟六隻。上次小編帶朋友去食，上枱唔駛兩秒就畀我哋食晒！一咬落去，熱辣辣嘅芝士🧀汁就噴出嚟，真係好正！諗起都流🤤口水！
今次小編分享咗五間位於Brisbane同Gold Coast嘅🇯🇵日本餐廳🍴，呢幾間都係小編經常幫襯嘅餐廳，唔知大家最鍾意邊間呢？如果各位Roodies有其他心水餐廳，歡迎喺下面comment話畀我哋知😛！
記得Follow/Share我哋 Facebook 同 Instagram!!!
IG: @kongaroo_au
FOOD IG: @kongaroo_food
Comments