2021年1月8日讀畢需時 2 分鐘

🐶為主子覓好西！澳洲Amazon狗糧推介

相信有唔少嘅Roodies 都有養開狗狗🐶，但唔知大家平時有冇話揀開邊隻狗糧呢？為咗主子可以健康成長，對於狗狗嘅食品一定要做足功課特別關注。今次小編就喺 Amazon AU 歸納咗某幾隻比較受歡迎嘅狗糧牌子，將會按照佢哋嘅Size同歲數，再根據價錢、營養價值去幫大家分析吓。🤓

介紹之前都要提提Roodies，記得要參考返你哋本身買狗糧嘅習慣，同埋喺買之前要了解返狗狗有無對啲咩ingredients有過敏症狀。特別係穀物敏感，因為穀物好容易喺狗嘅消化系統產生發酵反應，加上穀物係糖份高嘅食物，會將有益嘅菌排出，然後釋出毒素，破壞狗狗嘅免疫系統。

***以下價錢係以AUD澳幣為準***

【Amazon AU 最受歡迎嘅四大狗餅牌子】

1. Purina Supercoat

呢隻Purina Supercoat通常係用牛、雞或者鹿肉合成嘅，佢哋仲有一種係healthy weight，啱曬一班要減下肥或者keep下 fit 嘅毛孩試吓。另外一個佢哋咁受歡迎嘅原因就係因為價錢平！喺呢篇介紹幾隻牌子入面最平就係佢，賣緊$2.6/kg - $2.8/kg。值得留意嘅係，Protein對於毛孩都好重要㗎，呢款狗糧有成25%嘅Crude Protein，有助於保持狗的健康。有啲Roodies可能會擔心呢款咁平得唔得㗎？所以各位Roodies真係要了解狗狗狀況同佢哋嘅健康先好入手喇🤗。

2. Hill's Science Diet

如果想穩陣啲、唔介意畀貴啲嘅話，可以試吓呢隻Hill's Science Diet。首先佢係獸醫認可嘅狗糧，信譽都係良好。呢隻牌子嘅狗糧標榜只有好少碳水化合物嘅成份。大約$8/kg-$16/kg，買越大包就越抵嘅。佢啲狗餅都算細粒，入面有Omega 3，加強返佢哋嘅骨頭以致提高活動能力，同埋增強免疫力。總括而言，如果大家無咩特別要求，Hill's Science Diet都係唔錯嘅選擇🥳

3. Optimum

相信一班有養開狗狗嘅Roodies都應該會識呢隻牌子，喺一般超級市場都會見到。不過Amazon都賣得算平，一大包15 kg，都係 $4/kg 左右。Optimum大多數都係用雞肉合成，另外佢哋都有賣grain free product！畀大家多個選擇，可以減低狗狗對穀物過敏嘅可能性，加上仲有魚同菜，對皮膚、毛毛、消化系統都有好大幫助！🥳 大細🐶都適合，不過價錢就貴少少，差唔多$6/kg，小編覺得都值得一試啊！

4. Ivory Coat

呢隻牌子一樣有grain free嘅狗糧，適合幼犬同成年犬都有。不過要有心理準備grain free係比regular味道嘅狗糧貴🧐，大約$7/kg-$14/kg，視乎重量而定。根據美國飼料管理官員協會(AAFCO) 指出，成年犬嘅食糧至少需要18% 嘅Crude Protein，而呢隻牌子嘅狗糧就可以令你哋放心啦，主子一定食得好，瞓得好，生活得好！😇